Xafiis Joogga Wasiirradu Waa Tallaabo Joogtayn u Baahan! By: Cumar M. Faarax

0
38

23ka Wasaaradood ee xukuumadda afartameeye maalmood jirka ah ee madaxweyne Muuse Biixi, waxa lagu majeertay in isbeddel ku yimi xafiis-joogga wasiirrada cusub oo intooda badan aan laga waayin xafiisyadooda subax kasta maalmaha shaqada. Si ka duwan sidii xukuumaddii ka horreysay oo ay dhif iyo naadir ahayd in wasiir qudha xafiiskiisa laga helo inta badan saacadaha shaqada ee maalinlaha ah.

Sabtidii illaa Arbacadii toddobaadkii hore waxaan si joogto ah u booqday ama xidhiidh la sameynayey hawl-wadeenno iyo masuuliyiin ka tirsan 12 wasaaradood, kuwaasoo wasiirradoodu ku wada sugan yihiin caasimadda Hargeysa oo aanay shaqo ugu maqnayn gobollada dalka ama waddanka dibaddiisaba, aniga oo u kuurgalayey in wasiirradu maalin kasta ka xaadiraan xafiisyadooda inta lagu jiro siddeeda saacadood ee shaqo-maalmeedka dawladda Somaliland.

Natiijada kormeerka kooban ee aan dersay 12-ka wasaaradood, waxa aan ku soo arkay in dhammaan wasiirrada wasaaradahaasi ha ku kala badnaadeene ay saacadaha shaqada ee maalmihii Sabtida ilaa Arbacada la soo dhaafay si buuxda ugu sugnaayeen xafiisyadooda shantaas cisho ee xidhiidhka ah.

12kaas wasaaradood oo ka noqonaya tirada wasaaradaha 52%. Waxay ka dhigan tahay in wasiirrada xukuumadda cusub eeMadaxweyne Biixi xafiisyadooda negaadaan saacadaha shaqada.

Wasaaradaha aan soo maray waxa ka mid ah qaar shaqaalahoodu ii caddeeyeen in aanay hadda ka hor bil dhan oo xidhiidh ah arki jirin wasiirradooda oo xafiisyada fadhiya. Waxa kaloo xogta aan xaqiijiyey ka mid ah in wasiirrada iyo wasiir-ku-xigeennada cusub wada-tashi ku shaqeeyaan, marka ay noqoto ka go’aan gaadhista hawlaha maamulka iyo shaqo-maalmeedka wasaaradda.

Inkasta oo uu kooban yahay cimriga xukuumaddu jirtay, haddana waxa ka muuqda bilow wanaagsan oo ku dayasho mudan, iyadoo lagama maarmaan tahay in masuuliyiinta dawladda Somaliland oo dhan laasimaan dhaqankan maamul-wanaagga ifafaalaha u ah ee xafiis-joogista, balse aannu noqon mid aan dhaafsiinayn xiisaha hore ee marka wasiirka xilka loo magacaabo oo keliya.

Madaxweynaha Somaliland Md. Muuse Biixi Cabdi, ayaa kormeerkii u horreeyey oo ku soo indho-indheeyey Wasaaradda Horumarinta Caafimaadka Arbacadii, waxaanu ku guubaabiyey inay si anshaxooda xirfadeed waafaqsan ay ummadda ugu adeegaan. Si kastaba ha ahaatee, waxa ay guud ahaan bulshada reer Somaliland u danaynayaan inuu Madaxweyne Biixi si maalinle ah ugu dhabo-galo sida wasiirrada xukuumaddiisa cusub ugu adeegayaan ummadda, una gudanayaan waajibaadka qaran ee uu mid kasta u xilsaaray.
cumarmfaarax@hotmail.com

LEAVE A REPLY

Please enter your comment!
Please enter your name here